1Cor 4 | BEF | STEP | Lenali lali kumu kehelinogo Kilisitohi lili'nalo bo'a to Hu'mamofihi suguna ka'a kaba huto leli'ali bo lolo nohuta kehelilo.

1 Corinthians 4

Aposolomagi Kilisitohi mono ka'a li'ahanamofihi hapa'a

1 Lenali lali kumu kehelinogo Kilisitohi lili'nalo bo'a to Hu'mamofihi suguna ka'a kaba huto leli'ali bo lolo nohuta kehelilo. 2 To kaba bo'a enali foya'a li'ahanaguti mone tito be ligi'ehina ka henana ni'ibe? Afo'afu lina'asigo hite li'ahanamo ni'ibe. 3 To nani'ni ka lilube. Lenali hiti to bona'i luga'a hiti lolo hite minete nani hapa'nimofihi kehelinogo lamana'a lolo mehilina'mu yabe. To nani'ni hapa'ni beto mehiluna'mu yabe. 4 Nani nipa'nigu keta mehuse nohuto foipana'ni ni'ifi meni'ifi mekehelube. To ya hu'ehina lenali folagahatinigu lili'na li'ohunogo foipana'ni meni'igo nohube luto melilube. Nani hapa'nimofihi Sipi Bo moneko'uba li huto hilube'mu hibe. 5 Ya hu'ehina'mu lenali bona'magihi hapa'ani'mu lilata nehana amuya memalalo. Sipi Bouba ai'a i behe huto oto suguna'i fenene huto ni'ina nasana yamofihi le'mo hutotoga malalube'mu hibe. To bona'magita legekesa kehelilata nohutaga hiti ya'ma li huto hu su halube'mu hibe. Ya huloto Hu'mau ai'a bona'magihi hapa'ani moneko moneko'isi bu galina guna moloto enele'mo hetofa hu epololota liyafa hilube'mu hibe.

6 Nalalu'nigita lenali lali hapati ya hite bu gelete keheli fe lilabe luto kaga nolunamofihi nani to Apolosihi le'aliti'a ka lu moloto nolube. Monolugu hite melete minalo lite li'ahana ka'a ya'ma be meligise bona'i luga'a enele'mo ho tila luga'a enele'mobe kohobe mehilo. 7 Ki'afu ligo lenugufa le'momo titi nehabe? Lenalitoga ana'ina bai toto ni'ina yamofihi Hu'mau ya nasana melepi'ehifihe? O'e. Hu'mau ana'ina silaga'i lepi su ho'ehinamo ni'inagihe. Lenali henabe lite nekeheligo Hu'mau ana'ina melepi'ehina lolo nohigo laliti li huto nohune nelite lenugufatini le'momo tilata nehabe.

8 Lenaliya lenalitini'mu ma lite kehelilata nehabe: Lali lusa gigo ana'inati bai toto ni'ibe. Lali asaga'na keheli baga ito nohune lite nelafiye? Lali menohutogo lenali monolugu kibina bo lolo hite nehafihe? Lenali ya hite lebe ligi'ahanamo ni'ifi ya? Nohune lite lilata nehanaya Hu'mamofihi bulo lama'naka kibina bo lolo hilana ni'inaya, ya hite minete lali'i lele'mete binogo lenalitoga mino moloto ligihiti bogo ana huto lolo huto minaluta ni'itita bati hitine. 9 Nani nekesa kehelito ma luto lu nolepube. Hu'mau aposolo hiti lali fa'mene bona'magihi komopa'anigu lele'momo limito molo leto'ehina'a lolo nohibe. Ya hulago lahalana bo nohuta suhi lolo nohibe. Asagatoga agelo bona'i nehana to metoga bona'i nehana enali gili gili hite lali'i lubugo sibina hilago nohune. 10 Lali ya'ma Kilisito kumu yabe luto negi bona'i lolo huto nohutaya, lenali ya'ma Kilisitotoga nokeheluta nasanati bai toto ni'ibe lite kehelilata nehabe. Lali amuya hiti menohutaya lenali amuya hiti bo likibina bo tegi hite lolo nehana. Ya lite nekehelifihe? Bona'magi lama'naka luto lali'i ya'ma lele'mobe hokobe hilata nehanaya to fato bona'magi lenali lenugufa le'momo tilata nehabe. 11 Yatai huto nohina kana'alo lali ya'ma nose'nati'mu yafi nagami kumu kau'na nolahago filito nominone. Guketeti meninana nohune. To osahi lehelata nehabe. Nohati meni'igo bula ola huto fa'mene nominone. 12 Lugufamofihi nasana huto hilibe luto laliti layahatitu amuya foya lito li huto hulata nohune. Lali kumu lele'mobe hokobe hi'ahana bebe sose ka lu epololata nohune. Kalana'i nemele letago lipakafa menohose fa'mene nominone. 13 Yatai huto nohina kana'alo lele'mo sibina nehanaya fa'mene enele'mo fulu hulata nohune. Lali fa'menena lolo huto bona'i asagatoga sosopana legi huto minolata nohune. Ya'ma lali minomo buto yatai hiti ya huto nohune.

14 Nani lenubuya hilibe luto ya'ma kaga fayahi menokoyobe. Nani komopa'ni nolepuna pa'ni pana'ni lenegekesa li hokolo huto fayahi ya'ma nokoyobe. 15 Kilisitohi kamu'i babafi lilana bona'i ya'ma babu lite nehanaya afotinigi asaga'i menehabe. Yesu Kilisitohi hetofa ka kohe toto lu lepito aitoga lenele'mo bu'ohunagi afotinifita nani'nisigo lolo huto nohube. Ya'mu lenali pa'ni pana'ni yabe luto lu'ohuna. 16 Ya hu'ehina ya'ma nani nigiyakagu ite nemege talabe luto lenegekesa lito nolugi kehelilo. 17 Nani ya hilabe luto Timotihi ho lufugo lenalitoga foiya nobibe. Ai'i komopa'ni emi'ohuna bo Sipi Bomofihi mono kagu pana'ni lolo huto minoto ana'ina le'mo fu luto lolo hulata nohina bo ai buto nani Yesu Kilisitohi mono ka'amofihi kapo'a Kilisitohi naga'a noto noto nehana enelepito minolata nohunamofihi buto aku'i lu lepinogo kehelilabe.

18 Lenalitogati luga'amagi nani kumu ya'ma mealina'mu yabe lite lenugufa limo titi hite kegeiyo fa'mene minelata nehanaya. 19 Sipi Bouba lu kehelinogo bati hinogomo nani lenalitoga nobuto kegeiyo hite neminana bona'magihi kagi'ani keheliloto Hu'mamofitoga amuya mele'ahanamo ni'ilifi yamofihi hapa'a li huto hilube. 20 Hu'mamofihi mono kamofihi kapo'a fa'mene kagagu meni'ibe. Hu'mamofihi amuya'agu yamofihi huto hulata nohibe. 21 To lenali nani kumu henabe lite lilata nehabe? Kipakafa'a hiti obo lite nelafihe to komopaka bati hinogo fulu huto obo lite nelabe? Lenoloka ya nohobe.